Stórsýningin Verk og vit verður haldin í fimmta sinn dagana 17.-20. mars 2022 í Íþrótta- og sýningarhöllinni í Laugardal. Rúmlega hundrað sýnendur munu þar kynna starfsemi sína, nýjungar, vörur og þjónustu. Sýningarsvæðin eru uppseld. Sýningin átti að vera haldin í mars 2020 en sökum samkomutakmarkana var henni frestað til mars 2022.

Góður tími til þess að sækja fram
Sýningin Verk og vit hefur sannað sig sem mikilvægur vettvangur fyrir aðila í bygginga- og mannvirkjageiranum til að hittast, styrkja viðskiptasambönd og afla nýrra, kynna vörur og þjónustu og nýjungar, ásamt því að ræða málin, sem meðal annars skýrir þessa góðu þátttöku. Nú er góður tími fyrir fyrirtæki að sækja fram, þétta raðirnar og setjast niður með núverandi og nýjum viðskiptavinum og eiga samtal um verkefnin sem framundan eru. Til þess er sýningin Verk og vit frábær vettvangur, segir Áslaug Pálsdóttir, framkvæmdarstjóri Verk og vit.

Sem fyrr er sýningin ætluð fagaðilum á sviði byggingariðnaðar, skipulagsmála og mannvirkjagerðar. Meðal sýnenda eru byggingarverktakar, verkfræðistofur, skólar, fjármála-, ráðgjafa-, og hugbúnaðarfyrirtæki, sveitarfélög, tækjaleigur svo eitthvað sé nefnt. Þá gefst einnig almenningi og nemendum kostur á að kynna sér þessar mikilvægu atvinnugreinar þessa helgi.

Miðasala fyrir fagaðila og aðra gesti er þegar hafin á verkogvit.is

AP almannatengsl er framkvæmdaraðili sýningarinnar en samstarfsaðilar eru; atvinnuvega- og nýsköpunarráðuneytið, Reykjavíkurborg, Samtök iðnaðarins, BYKO og Landsbankinn. Sýningin verður opin fagaðilum á fimmtudegi og föstudegi og almenningur verður síðan boðinn velkominn á laugardag og sunnudag.