Vegna samkomutakmarkana sem nú eru í gildi og í ljósi þeirrar þróunar sem seinni bylgja heimssfaraldursins Covid-19 veldur, hefur framkvæmdaraðili sýningarinnar Verk og vit, að höfðu samráði við samstarfsaðila, ákveðið að fresta sýningunni sem halda átti í Íþrótta- og sýningarhöllinni í Laugardal 15.-18. október fram til 15.-18. apríl 2021.

Samkvæmt núgildandi reglum heilbrigðisráðherra eru fjöldatakmarkanir miðaðar við 100 manns. Það er viðbúið að fjöldatakmarkanir verði áfram í gildi. Reglurnar eru almennt gefnar út til tveggja vikna í senn en ljóst er að sýningarhaldari og sýnendur þurfa lengri tíma til að undirbúa sýninguna.

Verk og vit hefur skipað sér sess sem uppskeruhátíð bygginga- og mannvirkjageirans en á síðustu Verk og vit sýningu 2018 var sett aðsóknarmet en þá sóttu um 25.000 manns sýninguna þar sem yfir hundrað sýnendur kynntu vörur sínar og þjónustu.

Fagsýning eins og Verk og vit er mikilvægur vettvangur fyrir byggingariðnaðinn. Sýningin felur í sér tækifæri fyrir fagaðila, innlenda jafnt sem erlenda, að kynna vörur sínar og þjónustu og til að styrkja tengslanetið. Verk og vit hefur þannig skipað sér mikilvægan sess hjá fagaðilum til að hittast og mynda viðskiptasambönd að sögn Áslaugar Pálsdóttur, framkvæmdastjóra AP almannatengsla, sem er framkvæmdaaðili sýningarinnar.

Áslaug segist sannfærð um að sýningin Verk og vit 2021 muni verða ein sú mikilvægasta hingað til. Með samstilltu átaki og samstarfi verði vörn snúið í sókn. Í vor verði án efa góður tími til að sækja fram og þétta raðirnar og fara yfir verkefnin sem framundan eru.

Meðal sýnenda á Verk og vit eru meðal annars byggingarverktakar, verkfræðistofur, menntastofnanir, fjármála- og ráðgjafafyrirtæki, tækjaleigur, hugbúnaðarfyrirtæki og sveitarfélög.

AP almannatengsl er framkvæmdaaðili sýningarinnar en samstarfsaðilar eru atvinnuvega- og nýsköpunarráðuneytið, Reykjavíkurborg, Samtök iðnaðarins, BYKO og Landsbankinn.